BAILLANDO LA XOTA - 1986

Equí podemos ver la versión de la Xota’l Centru como la baillábamos nel añu 1986. Nun difier enforma de la manera en que lo faemos agora, cola salvedá que se trataba d'una manera un tanto coreografiada coles pareyes sincronizaes en filera y faciendo los mesmos puntos toes al empar.

Güei en dia baillamos la xota por pareyes sueltes  y caúna sigue'l baille independiente de les demás, eso sí, respetando les pautes del ritmu y la manera tradicional de baillar.

LA PICA EN FLANDES - 1990

Ente agostu y setiembre de 1990 realizamos una xira por Dinamarca y Holanda. Actuamos en llugares emblemáticos como los parques temáticos de Bakken o'l Tivoly de Copenhague consideraos de los más antiguos del mundu, según en distintos actos culturales. Y ye en Hengelo (Holanda) na Casa d'España onde nos faen esta grabación de la nuesa amuesa. A esos altores de la xira'l nuesu tambor taba de vuelta a casa por exames y la versión del Fandangu de Pendueles, qu'entós faíamos, acompañámoslu nesa ocasión a la pandereta, cola voz de los homes del grupu. La calidá d'imaxe y soníu, como n'otros casos, bien mala. L'orixinal en VHS que nos llega esta bien estropiáu y esti ye la resultancia final, que como siempres nos interesa más pol so valor testimonial. El cambéu na manera de la interpretación, la ropa, los bailles y l'acompañamientu musical, que guarda poca paecencia cola nuesa llínea actual, ye un bon exemplu de la manera interpretativa naquellos años.

XIRALDILLA - PUERTOLLANO 2003

Acabamos d'atopar esta grabación d'una xiraldilla que baillamos nel “VIII FESTIVAL HOMENAJE AL MINERO PUERTOLLANO – CIUDAD REAL” n'avientu de 2003. La calidá de la grabación nun ye bien bona  pero esperamos vos preste.

EL PERICOTE - LA FELGUERA 1986

EL PERICOTE - 1986

Presentamos de mano esti Pericote nel “IV Festival de Folclore de Llangréu” nes fiestes de San Pedro 1986. Anque la grabación ye de mala calidá, rescatada d'un mal video caseru, sirva de testimoniu de ver un Pericote bailláu al usu senciellu de Llanes, nuna interpretación de l'Agrupación Reija fai casi treinta años.

ENTAMAMOS A XUNTAR SONES

La nuesa agrupación entama a funcionar en mayu de 1955 y a lo llargo d'estos casi sesenta años fueron numberoses les actuaciones, amueses y talleres sobre música y cultura tradicional asturiana representaos pola mesma.

Como ye lóxicu d'imaxinar en tou esti tiempu la manera d'entender el folclore y les representaciones de música y baille camudaron. Magar hasta los años 70 atendiose a los cánones de la dómina representando los bailles al usu de los repertorios de Sección Femenina, a partir de los 80 l'interés pola busca d'un folclore mas “real” foinos llevando a ver el baille como un actu lúdicu, d'esparcimientu y d'espontaneidá interpretativa, alloñáu de montaxes coreográficos, que nun quita n'absolutu d'interés nin vistosidá.

Por eso nel momentu actual non solo faemos representaciones de baille con indumentaria tradicional o amueses col públicu como meru espectador, sinón que realizamos talleres o participamos en romeríes y actos festivos compartiendo la música tradicional cola xente y faciéndola participe de los bailles como daqué vivu.

Nel presente blog vamos amosar retazos de la nuesa hestoria como entidá, actuaciones de les distintes dómines, amueses y esposiciones o cualquier tema sobre cultura tradicional  tratáu pola Agrupación Reija anguaño o a lo llargo de la so trayectoria.

Entamamos.